Kinasuhan ni City Attorney Chiu ang mga kompanyang responsable sa ilegal na pagtatapon ng basura sa Treasure Island

SAN FRANCISCO (Abril 26, 2022) — Inihayag ngayon ng Abugado ng Lungsod na si David Chiu na nagsampa siya ng kaso laban sa Tip Top Trucking, LLC, Neeve Engineering, Inc, at sa prinsipal ng Neeve na si Joseph Lawrence, dahil sa ilegal na pagtatapon ng ilang toneladang materyales sa Treasure Island. Gumastos ang Lungsod ng $200,000 sa pag-alis at paglilinis ng materyales na itinapon sa lugar at humihingi ng danyos at multa para sa mga gastos na natamo.

“Libu-libong taga-San Francisco ang nakatira sa Treasure Island—hindi ito isang tambakan ng basura,” sabi ni City Attorney Chiu . “Sinisikap naming sagutin ang mga gastos sa pag-alis at pagsubok sa mga ilegal na itinapon na materyales, upang matiyak na ang Lungsod ay magiging maayos na.”

Noong Mayo 2019, nasaksihan ng isang kontratista ng Treasure Island Development Authority (TIDA) ang isang empleyado ng Tip Top Trucking na ilegal na nagtatapon ng lupa at materyales sa ari-arian ng Lungsod malapit sa Avenue I at 5th Street sa Treasure Island. Matapos ang isang follow-up na imbestigasyon ng TIDA, isiniwalat ng Tip Top Trucking na sila ay inupahan at ilegal na itinapon ang materyales sa direksyon ng Neeve Engineering at ng prinsipal nito, si Joey Lawrence. Wala sa mga akusado ang may pahintulot mula sa Lungsod na makisali sa aktibidad na ito.

Ang lupang ilegal na itinapon ay umabot sa ilang toneladang materyal na inalis ng Lungsod mula sa lugar at sinubukan para sa mga mapanganib na sangkap gaya ng hinihiling ng mga batas pangkalikasan ng estado. Sa pangkalahatan, ang Lungsod ay gumastos ng humigit-kumulang $200,000 sa mga gastos sa paglilinis bilang resulta ng ilegal na pagtatapon. Pinaghihinalaan na ang mga nasasakdal ay dati nang nagtapon ng mga materyales sa lugar ding ito.

Inaakusahan ng kaso ang mga nasasakdal na nilabag ang Batas ng Hindi Patas na Kompetisyon ng California sa pamamagitan ng paglabag sa ordinansa ng Lungsod para sa ilegal na pagtatapon ng basura, paglikha ng pampublikong istorbo, at pagpasok nang walang pahintulot sa ari-arian ng Lungsod. Humihingi ang Lungsod ng injunctive relief, danyos para sa gastos ng paglilinis, at mga multa.

Ang kaso ay Lungsod at Kondado ng San Francisco laban sa Tip Top Trucking, LLC.