Seguridad sa Eleksyon

Seguridad Panteknolohiya

• Sinertipika ng Secretary of State (Kalihim ng Estado, SOS) ang sistema ng pagboto sa San Francisco. Bilang bahagi ng prosesong ito, isinagawa ng SOS ang pagsusuri at ebalwasyon sa source code, pagtagos sa seguridad ng hardware at software, open-ended na kahinaan, at pagsubok sa pagpapatakbo upang patunayan ang performance at pag-andar ng sistema sa ilalim ng normal at hindi normal na mga kundisyon at upang matukoy at maresolba o mapagaan ang mga kahinaan.
• Hindi konektado ang mga sistema ng pagboto sa California sa internet sa anumang oras. Dahil dito, walang parte ng sistema ng pagboto sa San Francisco ang elektronikong tumatanggap o nagpapadala ng datos pang-eleksyon sa isang panlabas na network at gumagamit ang bawat lokal na botante ng papel na balota upang bumoto sila. Bilang karagdagan, upang makagawa ng na-o-audit na rekord ng bawat boto, lumilikha ang ating sistema ng pagboto ng mga image file ng binotohang mga balota na maaaring ma-verify at ma-sort (maisaayos ang pagkakalista ayon sa uri o klase) ng publiko; naglalaman din ang mga file na ito ng impormasyon sa kung paano binasa ng sistema ang mga marka ng boto sa bawat balota.
• Tanging trusted (mapagkakatiwalaan) build software lamang na ibinigay ng SOS ang aming ginagamit. Bago ang bawat eleksyon, tinitiyak namin na ang sistema ng pagboto ay katulad sa ibinigay ng SOS na trusted build sa pamamagitan ng muling pag-install ng trusted build o paggamit ng cryptographic HASH ng trusted build ng SOS nang sa gayon ay matiyak na tugma ito sa inaprubahang bersyon at hindi na-modify (napakialaman o napalitan).
• Anumang pag-modify sa isang sistema ng pagboto, kabilang ang mga pagdaragdag, at/o pagbura ng sertipikadong firmware, software, o hardware, ay kailangang awtorisado ng Kalihim ng Estado.
• Nakatago ang mga bahagi ng sistema ng ating pagboto sa isang ligtas na pasilidad na napoprotektahan ng mga kontrol sa seguridad at safeguard laban sa pisikal na panghihimasok. Sinusunod namin ang mahihigpit na hanay na itinatakda sa kustodiya para sa lahat ng software, firmware, at hardware na teknolohiya sa pagboto; tumatalima sila sa pederal na patnubay mula sa Department of Justice (Departamento ng Hustisya), Cybersecurity and Infrastructure Security Agency (Ahensiya sa Cybersecurity at Imprastrakturang Panseguridad), at ang Election Assistance Commission (Komisyon sa Tulong Pang-eleksyon).
• Bago ang bawat eleksyon, nagsasagawa kami ng masusing pagsusuri sa Logic & Accuracy (Lohiko at Kawastuhan) sa bawat piraso ng kagamitan sa pagboto na gagamitin. Gumagamit ang mga kawani ng mga batch ng balotang may marka na, pinoproseso sila, at pagkatapos ay kinukumpara ang mga aktuwal na resulta sa mga inaasahang resulta nang sa gayon ay maberipika na ang bawat unit at ang sistema bilang kabuuan ay gumagana a) sa aspetong mekanikal (hal., ang mga balota ay tamang naipapasok sa mga belt at roller nang hindi nagbabara), b) sa aspetong lohikal (hal., nakikilala ng unit ang uri ng balota), at c) nang may kawastuhan (hal., nababasa, nabibilang, at naiuulat ng sistema ang wastong bilang ng kabuuang boto).
• Pagkatapos ng bawat eleksyon, nagsasagawa kami ng mano-manong post-election na pagbibilang. Bilang parte ng pampublikong prosesong ito, mano-mano naming binibilang ang lahat ng mga regular na balotang binoto sa 1% (isang porsyento) ng mga random na napiling presinto sa San Francisco, pati na rin ang 1% ng mga random na napiling vote-by-mail at probisiyonal na mga balota sa buong lungsod. Isinasagawa namin itong mano-manong pagbibilang upang matiyak sa paraang matematiko na nabibilang nang tama ng mga kagamitan sa pagboto ang mga balota at wasto ang pagkakaulat nito sa mga resulta. Pagkatapos ang bawat eleksyon, nagsasagawa rin kami ng post-election ng risk-limiting na pag-o-audit bilang karagdagang pagsusuri.
• Isinasailalim namin sa SHA-512 cryptographic hashing ang lahat ng ulat ng resulta sa eleksyon upang mapagtibay ang integridad ng mga resulta sa paraang napapatunayan.

Seguridad sa Datos ng Botante

• Hindi nagsasama ang Departamento ng anumang personal na impormasyong makakapagtukoy sa ilang botante sa mga website application na aksesible sa publiko upang maprotektahan ang personal na datos ng mga botante mula sa hindi awtorisadong pag-access.
• Ang mga web application ng Departamento na nagbibigay ng impormasyon tungkol sa botante tulad ng katayuan ng kanilang vote-by-mail na balota, probisyonal na balota, rekord ng rehistrasyon, at mga lokasyon ng lugar ng botohan ay nasa isang offsite server at napoprotektahan ng Cloudflare, na siyang nagbibigay ng iba’t ibang tulong sa seguridad.

• May sinusunod kaming mahihigpit na alituntunin sa pagberipika sa elihibilidad at pagkakakilanlan ng bawat rehistradong botante. Bilang parte ng mga alituntuning iyon, regular naming sinusuri at ina-update ang database ng San Francisco pagdating sa rehistrasyon ng mga botante. Bilang halimbawa, nakikipag-ugnayan kami sa Department of Public Health (Departamento ng Pampublikong Kalusugan) at iba pang mga ahensya ng gobyerno na sumusubaybay sa mga pagpanaw upang tanggalin ang mga pumanaw nang botante sa listahan ng botante. Nakikipagtulungan din kami sa USPS National Change of Address program (programa ng USPS sa Pambansang Pagpalit ng Address) upang matiyak na naka-update ang mga rekord ng botante.
• Kapag ang isang sobre ng balota sa koreo ay ibinalik ng botante, inaalam namin ang pagkakakilanlan ng nagpadala gamit ang mahigpit na proseso ng pagberipika sa pirma na kinabibilangan ng tatlong tao. Kapag naihalintulad ang pirma sa pambalik na sobre doon sa (mga) pirma ng tagatanggap sa rekord ng rehistrasyon ng botante, doon lamang matatanggap ang balota para sa karagdagang pagpoproseso at pagbibilang. Kapag wala kaming nahanap na katulad na pirma sa file para sa isang ibinalik na balota sa koreo, susubukan naming makipag-ugnayan sa botanteng tagatanggap upang mabigyan sila ng pagkakataong i-update ang kanilang rekord ng rehistrasyon. Kung gagawin nila ito bago ang sertipikasyon ng eleksyon, mabibilang namin ang kanilang balota at maisasama ang kanilang pagpili sa mga resulta ng eleksyon.
• Binibigyan ang bawat lugar ng botohan ng talaan ng presinto. Inililista sa talaan ang pangalan at address ng mga botanteng nakarehistro sa presintong iyon. Nai-train ang mga manggagawa sa botohan upang magbigay ng probisyonal na balota sa sinumang may kuwestyonableng elihibilidad – ang balotang ito ay mabibilang lamang kung ang botante ay elihible.
• Pinapanatili namin ang isang dokumentadong hanay ng kustodiya na kinabibilangan ng maraming tao para sa paghawak ng balota at pagproseso ng mga gawain. Lahat ng mga manggagawa sa eleksyon na humahawak ng mga balota ay kailangang sumuri sa kasalukuyang tuntunin pagdating sa seguridad at pumirma ng pagtanggap sa mga tuntuning iyon. Sinasamahan ng mga Deputy Sheriff ang mga manggagawa sa eleksyon sa pagkolekta ng mga binotohang balota mula sa mga opisyal na kahon na hulugan ng balota.
• Kailangang sumailalim ang bawat manggagawa sa botohan ng San Francisco sa isang komprehensibong training at pumirma ng Poll Worker Oath (Panunumpa ng Manggagawa sa Botohan) bago maglingkod sa Araw ng Eleksyon. Nagbibigay ang training na ito ng detalyadong mga instruksiyon kung paano mapanatili ang seguridad sa panahon ng pag-set up, oras ng botohan, at pagsasara. Nagpapaskil din ang mga manggagawa sa botohan ng ballot accounting sa pagsasara.

• Lahat ng empleyado ng Departamento ng mga Eleksyon ay kailangang pumirma at sumunod sa mga patakarang nakalagay sa Acknowledgement of Election Integrity Laws and Security Protocols (Pagkilala sa mga Batas sa Integridad ng Eleksyon at mga Alituntunin sa Seguridad); kailangan din nilang suriin at sundan ang Pahayag ng Departamento ukol sa mga Aktibidad na Hindi Naaakma.
• Ang tamper-free (hindi madaling mapakialaman) na pagkakadisenyo ng mga opisyal na kahon na hulugan ng balota ng San Francisco ay tumatalima sa mahihigpit at espesipikong regulasyon sa estado. Bilang halimbawa, ang bawat isa sa mga 37 na kahon na hulugan ng balota ay yari sa mabigat at mataas na kaledad ng metal, naka-turnilyo sa lupa, at mayroong saktong sukat lamang na mga butas para sa paghulog ng balota at fireproof (hindi nasusunog) ang materyales.
• Habang pinoproseso ang mga naibalik na balota, may mahihigpit na patakaran sa operasyon na sinusunod ng mga manggagawa sa eleksyon. Pinoprotektahan ng mga patakarang ito ang kabuuang integridad ng eleksyon (hal., isang tao, isang boto) pati na rin ang indibidwal na karapatan ng botante (hal., ang karapatang bumoto ng lihim na balota).
• Mananatili ang mga balotang pang-koreo sa kanilang pambalik na sobre hanggang sa matanggap at nananatiling nakataob matapos buksan. Ang mga bumoboto nang personal ay binibigyan ng pantakip na folder o pambalik na sobre ng balota (mga probisyonal na botante).
• Nagpapanatili kami ng mga sistema kung saan madaling matutunton ng mga botante ang kanilang balota sa koreo mula sa pagtipon hanggang sa pagpapadala at pagpoproseso. Maaaring i-scan ng mga bumoboto sa personal ang kanilang balota sa lugar ng botohan at makumpirma na nabilang ng kagamitan sa pagboto ang mga balota.

Mga Madalas Itanong

Ano ang ginagawa ng Departamento ng mga Eleksyon upang maiwasan ang maling impormasyon at sadyang pagmali sa impormasyon tungkol sa eleksyon?

Sa Departamento ng mga Eleksyon sa San Francisco, nagsasagawa kami ng proactive na diskarte sa malaking alalahanin na ito. Kasama sa aming mga estratehiya ang:

• Malinaw na paglalathala, madaling maunawaan na impormasyon sa sf.gov at sfelections.org at sa aming mga naka-print na materyales.
• Pagbibigay ng matatag na outreach sa pamamagitan ng mga abiso, press release, social media, at live na mga presentasyon.
• Pagsubaybay at pagtugon sa anumang maling impormasyon na naka-post sa pampublikong media na may mga opisyal na katotohanan.
• Pag-abiso sa lahat ng lokal na rehistradong botante tungkol sa mga pangunahing petsa ng eleksyon, tuntunin, mga pagbabago sa pagpapatakbo, atbp.
• Pakikipag-ugnayan sa mga residente at kasama sa outreach sa iba’t ibang mga kaganapan (tingnan ang aming kalendaryo ng outreach sa sfelections.org/events.)

Ano ang maaari kong gawin bilang isang botante o interesadong partido upang makatulong na mapanatiling ligtas ang mga eleksyon?

Mayroong ilang mga bagay na maaari ninyong gawin upang makatulong na protektahan ang integridad ng ating mga eleksyon! Narito ang ilan sa mga suhestiyon upang matulungan kayong makapagsimula:

• Palaging i-check ang inyong record ng rehistrasyon bilang botante upang masiguradong lahat ng impormasyon, kabilang ang inyong address, ay tama at i-update ito kung kinakailangan.
• Sundan kami sa (@SFElections) sa Facebook, Instagram, X (Twitter), YouTube, at Nextdoor.  
• Basahin ang mga opisyal na balita, update, at pampublikong mga abiso na direktang ipinadala sa inyong email sa pamamagitan ng pag-subscribe sa aming mailing list.
• Maglingkod bilang isang manggagawa sa botohan o tagamasid sa mga eleksyon (maaari ninyong obserbahan nang personal ang mga proseso ng eleksyon o sa pamamagitan ng live na streaming).
• Mag-ulat ng maling impormasyon sa tanggapan ng Kalihim ng Estado sa VoteSure@sos.ca.gov at sa Departamento ng mga Eleksyon sa sfvote@sfgov.org.
• Mag-ulat ng kahina-hinalang aktibidad sa pagboto, tulad ng pandaraya, katiwalian, o pakikialam, sa alinman sa mga sumusunod:
  • Sa isang manggagawa sa botohan o sa aming tanggapan sa (415) 554-4310.
  • Sa ating Abugado ng Distrito sa (628) 652-4311.
  • Sa ating Kalihim ng Estado sa (800) 345-8683.

Pinapayagan ba ang pagboto nang online?

Hindi. Ipinagbabawal ng batas ng estado ang pagboto nang online, na sa kontekstong ito ay nangangahulugan na pagboto sa isang balota. Sa mga lugar ng botohan, maaaring magmarka at mag-print ng papel na balota ang isang botante gamit ang aparatong pangmarka ng balota at pagkatapos ay maipa-scan at mapabilang ang balota sa kagamitan sa pagboto. Katulad nito, napahihintulutan ang sinumang lokal na botante na mag-download at magmarka ng isang PDF na balota ng sistemang Aksesible na Vote-by-Mail, na, ayon sa batas, ay kinakailangang mapanatili ng bawat county sa estado. Gayunpaman, hindi nagtatago, nagsusubaybay, o nagbibilang ng anumang mga pagpili ang sistemang AVBM, at dapat na maibalik ang printout sa isang sobre, tulad ng isang regular na balotang vote-by-mail. (Karaniwang AVBM ang gamit ng lokal na mga botanteng may kapansanan o mga botanteng naninirahan o naglalakbay sa ibang bansa.)

Bakit hindi sinusuri ng mga opisyal ng eleksyon sa California ang mga ID ng botante?

Sa California, hindi kinakailangang magpakita ng ID kapag bumoboto, maliban sa ilang mga sitwasyon. Mga baguhang botante lamang na bumoboto sa unang pagkakataon sa isang pampederal na eleksyon at nagparehistro sa pamamagitan ng koreo, at hindi nagbigay ng numero sa Lisensya ng Pagmamaneho o numero ng Social Security, ang hihingian ng isa sa maraming klase ng ID na maaaring tanggapin, tulad ng bill ng utility o isang dokumento ng pagkakakilanlan na galing sa isang ahensiya ng gobyerno, at nagtataglay ng pangalan ng botante at address, o isang ID na may litrato tulad ng kard na ID ng estudyante.

Binibilang lamang ba ang mga probisyonal na mga balota ng San Francisco kapag dikit ang labanan?

Hindi, hindi iyon ang tuntunin. Ang sinumang botante na hindi agad matukoy ang elihibilidad (bilang halimbawa, hindi nakalista ang isang botante sa talaan ng presinto), ay aalukan ng isang probisyonal na balota. Pagkatapos ng Araw ng Eleksyon, sinusuri namin ang lahat ng mga probisyonal na balotang binotohan sa Araw ng Eleksyon. Kung nadeterminang elihible ang isang botante at wala pang binotohan na ibang balota, mabibilang ang probisyonal na balota. Maaaring i-check ng mga botante ang katayuan ng kanilang mga probisyonal na balota sa pamamagitan ng aming lookup tool para sa probisyonal na balota sa sfelections.org/pvlookup o sa pamamagitan ng pagtawag sa amin.